北京對台打壓日益升級，適逢5月份台灣各大專院校在港招生旺季，今年招生活動再度受阻，即便台灣主辦單位已經將招生活動由學校或商場，「退守」至台灣政府擁有嘅香港私人物業，但都被中聯辦「溫馨提示」唔準舉辦，最終活動只能取消。

《自由亞洲電台》報道，一直以來台灣方面都有同香港嘅商場或中學合作，舉行升學展覽同講座。不過，舊年嘅展覽因為官方打壓，多間大學撤展。

本來，今個月嘅25號同26號，應該會有場由台灣各大學香港校友會總會舉辦嘅升學展，喺台灣在港自資物業「海華基金會」會址舉行，但因為一啲「不可抗力因素」，主辦方最終決定取消活動，甚至參訪中學都要取消。據悉，考慮到唔同因素，今年由「大學問」舉辦的「高中職五專教育展」亦改為網上舉行，而唔係好似去年喺海華基金會實體舉辦。

有消息人士表示，突然收到活動取消嘅通知都覺得好驚訝，以前喺海華基金會舉辦嘅招生活動都冇受到干擾。根據了解，主辦方係因為收到中聯辦嘅「提示」而決定取消活動。

消息人士指，主要原因係港府啱啱立嘅23條，現時呢種活動可能涉及風險。北京嘅立場係，而家香港唔應該做啲鼓勵香港學生去台灣讀書嘅活動。

消息人士提到，因為活動會邀請台灣老師到場，出於安全考慮，主辦單位先決定取消。佢仲話，中聯辦好可能會用入境相關條例去針對。因為以往經驗中，有外國人參與本應係工作嘅活動，但無工作簽證，就被認為係違法。

至於將來香港是否唔會再有台灣嘅招生活動，消息人士相信，空間只會愈嚟愈窄，並引用中聯辦人士嘅話，要視乎台灣候任總統賴清德5月20日就職典禮講話嘅內容，會否令兩岸關係緩和。

事實上，相關嘅招生活動近年常受阻撓或打壓，而赴台讀學士嘅港生人數亦有顯著下降趨勢。自2020年高峰嘅2345人，其後逐步下趺，至2023學年只有776人，比起疫情及「反送中」前仲要少。

例如去年嘅「23香港台灣教育展」，本有50間台灣公私立大學參與，但由於官方要求不得顯示「國立」字樣，導致11間公立大學退出。活動當日，食環署仲派人到場審查宣傳品，連字眼提到「僑生」、「海外」、「蔡英文總統」等都不得展示。

教育局亦建議所有公立中學，唔好參與去年嘅「台灣高中職五專教育展」。而2022年，「台灣各大學香港校友會總會」先後遭3間香港中學拒絕借用校舍，結果只能取消教育展。

主辦單位對此事未有回應，而台灣陸委會就表示，相關活動有助於臺港良性互動，希望相關方面能正面看待這個問題。《I》