中國樓市持續低迷，百大房企4月銷售金額按年勁減近一半，官方出台政策力推「去庫存」，各地紛紛出招刺激樓市。繼深圳之後，一線城市上海，都加入咗住屋「以舊換新」嘅行列。呢個政策主要係由開發商幫助住戶將自己嘅舊屋賣掉，然後再喺特定範圍內買新屋。而家可以揀嘅新屋建築都喺上海郊區。

中國樓市研究機構克而瑞(CRIC)發布最新數據，中國內地百大房企4月銷售金額為3121.7億人民幣，按月減少12.9%、按年大減44.9%，單月業績規模仍處於歷史較低水平。

數據亦顯示，約有七成百強房企4月銷售業績較3月下降，其中萬科銷售額較3月大跌超過40%。相較之下，僅「保利」、「碧桂園」等少數企業，銷售逆市上升。至於今年前4個月，百強房企銷售額年減46.8%，顯示內房目前仍陷入泥沼。

中共中央政治局喺4月30日會議中強調，要「統籌研究消化存量房產和優化增量住房的政策措施」，業內人士觀察指出，今次係自2014年來，中國監管層首次強調「去庫存」。

根據內媒《觀新聞》同《證券時報》報道，上海市房地產行業協會同埋上海市房地產經紀行業協會聯合提出呢個倡議，希望喺上海全市推行商品住宅「以舊換新」活動，方便居民換屋。

呢個政策主要針對計劃出售舊屋然後買新屋嘅居民。住戶首先同房地產公司達成買新屋嘅協議，然後由房地產經紀機構優先推動佢哋嘅舊屋交易。舊屋賣出去之後，就可以按照協議完成買新屋嘅交易。

首批參與呢個倡議嘅房地產開發企業有20幾間，而房地產經紀機構亦有將近10間。而首批參與倡議嘅建築有30幾個，主要喺嘉定、松江、青浦、奉賢、臨港等地區，都喺上海市中心以外。

房地產市場低迷，有啲地區嘅舊屋價格迅速下跌，導致有意買屋嘅人都持續觀望；而賣舊屋難，亦令想換屋嘅人缺乏足夠資金買新屋。因此，多個城市推出「以舊換新」政策，希望方便民眾換屋，同時推動新屋銷售。

參加「以舊換新」活動嘅開發商承諾，如果一定時期內舊屋未能成功出售，購房居民可以無條件「退房退款」；而房地產經紀機構亦承諾，對購房居民嘅舊屋會全力推廣同優先銷售。今次上海「以舊換新」活動係建立喺部分房地產開發企業同經紀機構嘅基礎上，進一步擴大參與範圍。

喺深圳同上海之前，中國已經有好多城市探索實行住宅市場「以舊換新」，方法包括提供貸款優惠、由國有企業收購舊屋然後讓民眾喺指定建築度選購新屋等。不過，同啲政府主導嘅城市唔同，深圳同上海嘅住宅「以舊換新」主要係由市場力量推動，參與者包括開發商、購房者、中介機構同行業協會。《I》