2019年以來，香港新聞界已出現翻天覆地嘅變化，隨時面臨「串謀發布或複製煽動刊物罪」，甚至《港區國安法》多項罪名嘅威脅，以致本地媒體紛紛結業，外國媒體選擇出走。曾以香港作為亞洲總部嘅美國媒體《華爾街日報》（WSJ），今（5日）宣佈對亞洲業務進行調整，將總部由香港轉移到新加坡，並辭退大部分香港職員。

華爾街日報部分香港記者會調至新加坡或亞洲其他地方，另有多名駐港記者同編輯被裁，被解僱人數占目前香港駐站規模過半，今後香港駐站人數只有個位數。

華爾街日報總編輯塔克（Emma Tucker）昨日喺內部嘅通函中表示，「一如我們報道嘅好多公司一樣」，《華爾街日報》會將亞洲嘅運作重心由香港轉移去新加坡，並提及部分同事將被迫離開，大部分來自香港。

據悉，華爾街日報會喺新加坡設立編輯室，報道內容會包括中國股市、樓市、電動車、港股等商業新聞。

雖然通函冇提及香港嘅政治環境或國家安全法律，不過好多華爾街日報嘅新聞工作者都表示，公司呢個決定可能同香港近年嘅情況有關。

早前，美國媒體《自由亞洲電台》亦宣佈撤離香港。《自由亞洲電台》大概喺今年2月底通知香港部門嘅員工，準備3月尾撤出香港辦公室。該公司有4名全職同3至4名兼職員工，部分員工會調到台北辦公室或者華盛頓總部，另外一啲可能會被裁員。等員工撤走後，香港辦公室喺4月中前正式閂門。

《自由亞洲電台》3月29日發聲明指，港府將該公司稱為「外國勢力」等行動，令人嚴重質疑《基本法》第23條立法後，是否能在港安全運作。出於對工作人員同記者安全嘅擔憂，《自由亞洲電台》將保留其官方媒體註冊，但不再保留全職人員在港，實體分社亦已關閉。

今年2月，香港保安局局長鄧炳強曾經就23條立法相關報道，批評《自由亞洲電台》錯誤引述評論，話「23條立法罪行針對媒體」，並稱「誤導香港市民，恐嚇香港市民嘅報導，必須反駁」。

本地傳媒方面，港府於2021 年以國安法為由拘捕多名《蘋果日報》高層並凍結《蘋果日報》資金流，導致其資金斷鏈，被迫停刊。

同樣喺 2021 年，《立場新聞》總編輯及 4 名高層都被以同樣理由被捕，係自 1997 年以來香港首宗傳媒被控煽動。《有線新聞》中國組則被逼解散。

如今喺香港從事新聞工作，已經變成一項高危險嘅工作。歐洲議會大約一週前通過決議，呼籲港府要求停止對新聞工作者嘅起訴，並要求歐盟成員國提供「救生艇計劃」，支援香港社運人士同記者。《I》