美國大型律師行Mayer Brown宣佈同香港老牌律師行「孖士打律師行」拆夥。孖士打將會獨立經營，仲會用返08年合併前嘅名字「Johnson Stokes & Master」。Mayer Brown就會透過新合夥人繼續喺香港做生意。

根據分拆協議，呢個安排需要等香港律師會通過，預計係今年年底之前生效，明年中就完全獨立。孖士打暫時無計劃裁員。孖士打係香港歷史最老嘅律師行之一，自1863年喺香港開始營運，而家喺港有170名律師。孖士打近年亦牽涉過唔少香港政治事件，例如2021年退出代表港大處理「國殤之柱」一案，而被前特首梁振英批評。但係去年佢哋開160週年酒會，中聯辦都派人出席。

《華爾街日報》嘅總編輯Emma Tucker就周四（2日）向員工發咗個內部通訊，公佈離開香港嘅消息。佢提到，將亞洲嘅重心由香港轉移去新加坡，同時強調呢個舉措「就如我哋報道過嘅好多公司咁」。但係信中並冇提及離開香港嘅原因，亦無講23條立法或者香港政治氣候、商業環境等。不過據《明報》報道，好多《華爾街日報》嘅編採人員都覺得呢個決定可能同近年香港發生嘅事件有關。

Emma Tucker講，香港嘅員工會有啲離開，同時會喺新加坡增加一名編輯，負責新成立嘅小組，專注中國股樓市、電動車業同香港經濟等嘅報道。據《明報》了解，香港嘅記者同編輯人數將會大幅減少至個位數，部分人員會調到新加坡。

唔止《華爾街日報》，有啲國際傳媒機構喺23條立法後都撤離香港。而被中國外交部同港府多次批評嘅美國《華爾街日報》，就係喺世界新聞自由日之前宣佈，將亞洲區總部由香港遷往新加坡，而駐香港嘅編採人員亦會大幅減少。據《明報》報道，部分喺港嘅記者會調去新加坡，同時有近半喺港嘅編採人員會被裁員。

律政司長林定國就周一（29日）係報章撰文，聲稱23條立法後，只要傳媒貫徹基本專業原則，就唔需要顧慮違法風險。不過根據無國界記者早前統計，係今年，港府至少7次公開譴責香港及海外傳媒，包括《華爾街日報》。保安局局長鄧炳強就3月12日公開強烈反對同譴責《華爾街日報》評論部嘅一篇《香港以新安全法加倍鎮壓》嘅評論文章，直指呢篇文章「具誤導性及不當言論」。

除咗《華爾街日報》，《紐約時報》就早前將香港分社遷往南韓首爾，回應中國政府對香港施加嘅新聞自由限制；同樣係被保安局局長鄧炳強點名譴責嘅美國自由亞洲電台，上個月亦結束喺香港嘅辦事處。