根據《自由亞洲電台》3號報導，近期廣東省連續多日強降雨。「梅大高速公路」在5月1號凌晨發生嚴重塌陷。根據當局通報，至今已造成48人死亡，30人受傷。當局宣稱係暴雨致土坡累積大量水分，最終因承受不住壓力致土坡坍方，不過有專家及網友提出質疑，認為施工品質或工程用料存在質量問題。

在中國五一長假首日凌晨，廣東「梅大高速公路」（又稱「梅龍高速」）大埔向福建方向路段，在凌晨2點發生多次塌陷，有20幾架車因閃避不及墜落山坡，有汽車在撞擊之後爆炸起火。 至少造成48人死亡，30人受傷。 當局表示，目前搜救工作仍然進行中。

有中媒報道指，出事路段路面塌陷範圍相當大，長有17.9米，面積大概184.3平方米。 有報導指出，梅大高速路在2014年底完工通車之後，在今年4月1號及舊年都曾因豪雨，在多個地點發生多次塌陷事件。《美聯社》報道指，今次事發地梅州市，一個月內就累積至少56毫米嘅雨量，係舊年同期四倍。

美國「基建土木工程公司」（CRS Engineers）副總 貝爾（John Bale, PE）表示，就咁睇上去，事故路段更似一個自然坡道，土壤受到豪雨浸潤過度吸水而塌陷，而且斜坡都有被植物良好覆蓋。雖然可能存在其它原因，但佢估係「斜坡不穩定」，導致邊坡崩壞。

貝爾指出，需要現場勘察道路之橫截面，先能判斷係咪施工出咗問題。 佢解釋，公路建在山坡上，路面下是否充分填土，由照片上分辨唔出。如果出事路段在下坡 ，有可能係坡度太陡，又或者係土壤本身「不適合咁大嘅坡度」。

至於事件是否能提前防範？根據《界面新聞》報導，有工程師對此指，發生土石流前，跡象應該應該已經好明顯，當時就應決定「先封閉道路」。佢認爲，除咗地質結構及雨水侵蝕，承建方嘅施工品質都好關鍵。

呢位工程師指出，如果道路下方路基採用填方方式處理，除咗相鄰段要做簡要護坡工程，仲要用「重力式」擋土牆搭配「土釘、錨杆、 抗滑樁」之類嘅擋土及支護結構，先能完整對抗土地嘅重量。

貝爾認爲，事發之前通常會見到小部分塌陷，或出現懸崖陡壁等造成塌方之原因。但一次過落咁多雨係一個自然現象，通常要發生之後先會知道有幾多水會滲入山坡，導致土壤含水量出現飽和。

報導指出，梅大高速運營十年，期間發生多次塌陷，今次更加係死傷慘重，事件引起北京當局高度重視。《央視》報道指，國家防汛抗旱總辦公室及國務院安委會辦公室，先後召集會議並下發通知，要求強化災害防範，防止類似事件再度發生。

「通知」指出，特別係「重要幹道」如果無法確保安全，就要堅決封閉。 中國國家主席 習近平對此指示，各地區和有關部門應加強監測預警，並及時排查隱患，確保人民群眾生命財產安全及社會大局穩定。

報導引述資深旅美財經媒體人 王劍嘅觀點，王劍表示，「事件」本就是政治，並非習近平刻意提升到政治層級。一個高速路、豆腐渣工程搞成咁，肯定大有問題，而且由承建方至營運方，全部都係國企。顯示國企對此事件有「不可推卸之責」。

台灣《中央社》報道指出，「梅大高速」由廣東「大潮高速公路有限公司」營運管理，屬廣東省屬國企「廣東省交通集團」。 另外《第一財經》報導指，梅大高速之建造單位係「廣東省路橋建設發展有限公司」。 公司最早係「廣東省公路管理局」在1994年投資組建之全民所有制企業，2000年後移交俾廣東省交通集團管理。