政權依家張口埋口都係所謂嘅國安，甚至連審計報告都可以用作擦鞋同文字獄嘅工作。審計署今日（24日）發表八份審計報告，點名香港郵政、衞生署、醫管局、香港資優教育學苑、教育局未有喺部分工作中加入國安條款，此舉可謂係走火入魔。

審計署針對海關便利商貿、香港郵政、鄉郊保育辦公室等八個機構工作，進行衡工量值式審計。喺呢啲報告當中，審計署繼續加入咗「國安審計」嘅元素。

審計署指出，香港國安法喺2020年6月30號實施，而香港郵政會為每一個核准嘅郵票主題，安排設計師設計郵票圖樣。佢哋指出，當審查香港郵政同設計師簽訂嘅服務協議之後，發現當中冇關於維護國家安全嘅特定條款。佢哋表示，需要喺同設計師簽訂嘅服務協議度加入有關條款。郵政署長表示，同意審計署嘅建議，表示香港郵政非常重視國家安全，稍後會加入有關條款。

審計署亦批評，香港郵政喺寄送郵件去中國內地嘅跨境郵政服務上，錯誤描述為「國際服務」，包括喺郵政嘅網站「投寄資訊」同埋手機應用程式「主要郵遞服務」度，將寄去中國嘅郵政服務列係「國際服務」嘅一部分；而喺香港郵政嘅網站上載嘅過往14份年報，從2009/10至22/23財政年度，都將寄往中國各地區嘅郵件歸類為「國際郵件」。審計署認為，郵政需要確保準確地描述郵政服務，同埋盡快採取適當嘅行動修訂呢啲描述。

至於緊急牙科服務同長者牙科護理支援方面，衞生署同醫管局喺13間診所提供服務。除此之外，長者醫療券計劃同關愛基金都有撥款資助長者牙科服務。審計署指出，留意到服務協議當中，冇有關維護國家安全嘅具體條款，需要加入。

另外，喺資優教育方面，審計署指出，香港資優教育學苑同教育局合作，提供資優教育服務。資優教育基金由成立至2023年，獲批撥款總額為22億元。審計署指出，學苑對維護國家安全嘅責任，同公營學校一樣重要，但留意到至今年一月，學苑都未曾訂立或推行維護國家安全嘅具體措施。

報告指出，「儘管學苑委聘服務供應商向其學員和持份者提供課程及服務，但並沒有在其採購政策、招標文件和合約加入維護國家安全的相關具體措施」。香港資優教育學苑院長回應指，已經喺今年三月更新咗其指引、行政和採購程序，以及規則。

唔少網民都對審計署此舉嗤之以鼻，有網民話：「緊急牙科服務點加？病人宣誓左先可以做手術？」、「真心問可以點維護？即冇爛牙=安全左定點？」、「雖然病人牙痛到仆街，但要完成背景審查，先可以開始治療」，甚至有網民話「係咪要用牙齒燈照住個病人審：點解甩大牙？係咪犯國安呃國家？」、「係唔係危害國安要收返隻牙？」。《I》