深圳有餐廳貼出告示願意「蝕底」接受以港幣現金兌人民幣1:1 消費，按目前匯率計算，以港幣埋單變相獲約九折優惠。有網民分析，「港紙等於美金，老細勁識玩，即埸走資」、「重點係收可自由兌換嘅現金」。早前有內媒稱港人為「現金奶牛」，實在所言非虛。

《香港01》報道，近排有網友分享相片，話喺深圳福田區連城新天有間上海菜餐廳貼住告示，話呢度接受港幣消費，而且仲係1：1嘅匯率，「歡迎香港新老顧客回家吃飯」。根據4月21日嘅匯率，100人民幣可以換大約110港幣，價值仍然高過港幣。告示話「深港一家親」，想歡迎香港嘅新舊顧客，所以就接受港幣現金消費，但係因為店內港幣散紙有限，所以唔接受500同1,000港幣。

樓主喺文中指，照片拍攝於本月20日，慨嘆香港飲食業已處於水深火熱中，若深圳食肆接受港幣消費，無疑係「踩多腳」，讓香港食肆雪上加霜。

帖文引來大批網民討論，有人表示現時許多深圳商店均接受港幣現金支付，並非罕見做法，「好多舖都1：1啦」、「口岸附近有啲餐廳係真係收港紙當人民幣用！不過，現金要找散紙點樣找就真係唔知，因為未試過，但見到有酒樓，茶餐廳，燒味舖都係咁貼咗出嚟」、「啲餐廳也是拼了，說香港的餐飲業難，其實深圳也不容易」、「而家兩幣差得好少，所以1兌1都問題不大了」、

不過更多網民係推測商家咁做嘅背後原因，認為係因為港幣較易兌換成其他外幣，「你問吓內地人，如何將數字人仔變做美金現鈔，難過登天」、「現金為王，唔怕電子收費變電子收廢」、「要港紙不要人民幣，識少少財經就明乜事啦」、「坦白講，如果老細可以收多啲港紙，我覺得佢真係何樂而不為，起碼港紙可以自由兌換到」，甚至有網民直接話：「港紙等於美金，老細勁識玩，即埸走資」、「重點佢地想你俾現金，電子支付聽聞佢地拎唔到錢出黎」。

早前，內媒有文章《深圳，猛吸香港錢》喺內地廣傳，講述港人北上深圳嘅現象。文章以「香港這樣一隻現金奶牛」來形容香港人。指喺喺深圳，靠近口岸嘅主要商圈附近，有唔少「面向港人口袋嘅服務業態」，目的就係要賺香港人嘅錢。

事實上，香港人一向手上的確有好多「現金」。去年香港存款保障委員會發布咗一項調查，顯示港人認為平均要擁有108萬港元儲蓄或流動資金先夠足夠嘅「安全感」。另外，港人每人每月平均儲蓄金額，按年由7700元增加咗至9000港元，增幅達17%。《I》