美國國務卿布林肯即將訪華，中方官員提前放話有四大紅線要美方不可碰觸，分析認為實際上中方喺向美方暗示，絕對唔會停止壓逼台灣、絕對唔會推進民主人權、絕對唔會改變政治制度，以及絕對唔會放棄持續發展超越美國嘅企圖。

布林肯將於周三（24日）至周五（26日）訪華，中國外交部向媒體召開吹風會，稱中方對布林肯訪華主要聚焦五大目標，包括樹立正確認知、加強對話、有效管控分歧、推進互利合作同共同承擔大國責任。

針對有效管控分歧方面，外交部美大司負責人強調，美方尤其不能觸碰中方喺台灣、民主人權、道路制度、發展權利等問題上嘅紅線。中方維護國家主權、安全、發展利益嘅決心和意志堅定不移，將重點就台灣、經貿科技、南海等問題闡明嚴正立場、提出明確要求，又話台灣問題係中美關係第一條不可逾越嘅紅線。

負責人又指出，美國針對中國嘅經貿科技打壓措施變本加厲，美方拋出「中國產能過剩論」，旨在為美謀求更有利競爭地位同市場優勢，係赤裸裸嘅經濟脅迫同霸道霸凌。

負責人續稱，中方堅決反對美方插手南海問題，挑撥中國同東盟關係，美國唔係南海問題當事方，唔應該介入，更唔好攪局。

負責人並表示，芬太尼唔係中國嘅問題，都唔係中國造成，但中方冇袖手旁觀，願意向美國人民提供幫助，美方應對等解決中方關切。

至於俄烏戰爭方面，負責人依舊稱為「烏克蘭危機」，話中方唔係呢場危機嘅製造者同當事方，又指責美方需要切實反思自身喺「烏克蘭危機」中應當承擔嘅責任，不得攻擊抹黑中俄正常國家關係，仲應該立即停止對中國企業同個人「濫施」單邊制裁。

有分析認為，北京當局此番說話十分露骨，完全透露出真實意圖。北京明確向華盛頓傳達呢幾點係絕對唔會改：

1.台灣：中方唔會停止施壓台灣，對台立場唔會軟化，會繼續以戰機、軍演、無人機、航線等手段擾台。

2.民主人權：中方唔會停止對新疆、西藏、香港嘅高壓手段，唔會停止針對國內異議人士。

3.道路制度：中方唔會進行政治改革，唔會改變既有政治制度，唔會放鬆社會管控。

4.發展權利：中方唔會放棄任何彎道超車嘅機會，唔會放棄意圖取代美國嘅決心。