《第19屆西太平洋海軍論壇》喺星期日至星期三（21日至24日）喺山東青島舉行，菲律賓唔單止冇派代表出席，仲宣佈喺南海附近同台灣附近搞代號「肩並肩」（Balikatan）嘅軍事演習。中國外交部發言人用「一再挑釁，只會升高局勢」嚟回應。學者分析，美菲呢次演習明顯係針對中國喺南海嘅軍事擴張，預計近期區域緊張局勢會繼續升溫。

今年，菲律賓係《西太平洋海軍論壇》成員國之一，但冇派代表參加，星期一（22日）仲喺馬尼拉搞記者會，宣佈要進行為期三個星期嘅美菲「肩並肩」大型聯合軍事演習。呢次演習動員咗1萬6700個官兵，演習嘅重點地區喺菲律賓北部同西部，特別係遠至菲國北端嘅巴丹群島（Batanes）同巴拉旺島（Palawan）以西。巴丹群島喺台灣同菲律賓呂宋島之間，距離台灣唔夠200公里，係控制呂宋海峽同巴士海峽嘅重要樞紐，戰略地位十分重要。

菲律賓參謀總長布勞納（Romeo Brawner）喺開幕式致辭時講，美國同菲律賓作為沿海國家，為應對威脅地區和平安全嘅複雜挑戰，會同其他志同道合嘅夥伴一齊，全力維護印太地區嘅穩定同繁榮。

中共中央軍委副主席張又俠喺《西太平洋海軍論壇》開幕致辭時，雖然冇直接點名批評呢個演習，但話海洋唔應該係各國炫耀武力、推行炮艦外交嘅競技場，仲警告話隨便挑起爭端、刻意製造緊張嘅行為，最終會害人害己。

張又俠講：「中國一向堅持同直接當事國友好協商解決海上爭端，但如果有人蓄意侵權，我哋會依法維護自身權益，如果有人無理挑釁，我哋一定會據理反擊。我哋唔會無端生事，但絕對唔驚事。」

中國外交部發言人汪文斌喺星期一（22日）嘅例行記者會上，對於菲律賓否定咗中菲兩國對南海仁愛礁嘅「君子協議」作出批評，話菲律賓唔守信用。汪文斌話：「如果遵守中菲達成嘅共識，就可以有效維護仁愛礁局勢穩定，符合中菲雙方嘅共同利益。如果違背咗承諾，一再挑釁，只會升高局勢，最終會令自己陷入困境。希望菲律賓可以正視現實，作出理智嘅決定。」